Главная » 2015 » Март » 17 » Оhуохай киэhэтэ
10:55 Оhуохай киэhэтэ | |
| Кулун тутар 15 күнүгэр Өҥөлдьө нэһилиэгэр дьоһун күн буолан ааста. Саас иһэр сибикитэ биллэн, халлаан лаппа сылыйан, саха дьонун сүргэтин көтөҕөн, хара сарсыардаттан олох үчүгэй күн үүннэ. Төрөөбүт буоруттан силистэнэн-мутуктанан иитиллибит, норуотун, нэһилиэгин историятын, дьонун-сэргэтин майгытын, үтүө үгэстэрин, тылын-өһүн, ырыатын-тойугун этигэр-хааныгар иҥэриммит, утумнаабыт, билэр эрэ ыччат чэчирии сайдара саарбаҕа суох. Дьэ ол иһин төрөөбүт норуотун кутун-сүрүн иҥэрэргэ киһиттэн киһиэхэ бэриллибит норуот талааннаахтарын туһунан номохтору, сэһэннэри, ырыалары-тойуктары умнубакка илдьэ сылдьан көлүөнэттэн көлүөнэҕэ тиксэрэр, тиэрдэр хайаан да наада. Урукку кэмнэргэ уйгу-быйаҥ аргыстаах самаан сайын барахсан үтэн–анньан кэлиитигэр Өҥөлдьө дьоно–сэргэтэ көтөҕүллэн сырдьыгыныы көөнньүбүт, буһуу арыы туналаах, сылгы кымыһынан айах тутан туран ыһыах ыһар ытык–мааны сирэ–уота Бэрэ сыһыыта буолара. Хорулаттан, Таркаайыттан, Малдьаҕартан, Чуукаартан, Аллараа Бэстээхтэн “Бэрэ” ыһыаҕар киһи–сүөһү мустан–хойдон туран үҥкүүлээбит, үрүҥ тунах кымыһынан тамахтарын ханнарбыт, амтаннаах эт хорчуоппатынан, сүөгэй үрүҥнээх алаадьылаах чэйинэн үүттэммит, ааттаах–суоллаах үҥкүү тыла этээччилэр кэрэ, чуор куоластарын күнү быһа истэ–истэ тириилэрэ тэнийиэр диэри үҥкүүлээбит аххан алаастара буоллаҕа. Бэйэлэрин кэмнэригэр Дмитрий Иванов Чуохаһын, Григорий Васильев–Чоҥхотто, Николай Алексеевич Петров, Софрон Иванович Алексеев-Халлаан Соппуруона, Иван Саввич Михайлов-Тиэрээ, Петр Егорович Хондоров, Лев Семенович Андреев, Василий Прокопьевич Степанов, Федот Яковлев-Баҕыак, Петр Кириллович Семенов, Мартын Софронович Андреев, Аркадий Андреевич Григорьев, Василий Павлович Саввинов курдук оһуохайы, тойугу, олоҥхону өрө тутан толорор, дьон сэҥээриитин ылбыт, нэһилиэк, оройуон иһинэн ааттара киэҥник тарҕаммыт норуот ырыаһыттара бааллара. Ааспыт 20 үйэ иккис аҥарыгар нэһилиэк эдэр ыччат дьонноро бэйэ-бэйэлэриттэн көҕүйэн ыһыахтарга, араас оонньууларга, түмсүүлэргэ түөлбэ түһүлгэтин иилээн-саҕалаан үҥкүү тылын этиинэн умсугуйбуттар. 2012 сылга Ньурба оройуонугар Өрөспүүбүлүкэтээҕи Олоҥхо Ыһыаҕа ыытылларынан сибээстээн иһитиннэрэр-биллэрэр тэрээһиннэр көмөлөрүнэн республика үрдүнэн биллибит биир улахан олоҥхоһуппут И.С.Федоров–Бөттөс уола, бу күннэргэ дылы оһуохайы оройуттан тутан үҥкүүлүү, этэ-туойа сылдьыбыт Е.А.Николаев, билигин Дархан этээччи ытык аатын ылбыт А.И.Степанов тустарынан кылгастык билиһиннэрэн, “Норуот талааннаахтара” кыра хомуурунньук хомуйан онорон олохтоох дьаьалта таьаарбыта. Кинилэр тустарынан биир дойдулаахтара эрэ буолбакка бар дьон билиэхтээх, торообут дойдубут ыччата сэнээрэ уунуохтээх. | |
|
| |
| Всего комментариев: 0 | |