«Биhиги бииргэбит» - лидер оҕолор түмсүүлэрэ.

Муус устар ый 12 күнүгэр  Өӊөлдьө орто оскуолатыгар, «Сэргэлээх» оҕо тэрилтэтин көҕүлээhининэн, «Биhиги бииргэбит» диэн оҕо тэрилтэлэрин лидердэрин түмсүүтэ буолан ааста. Тэрээhин сүрүн сыалынан буолла: оскуола иhинэн үлэлиир оҕо тэрилтэлэрин үлэтин күүhүрдүү, үрдүк таhымӊа таhаарыы, оҕо лидерскай хаачыстыбатын сайыннарыы, оскуолалар ыккардыларыгар доҕордуу сыhыаны үөскэтии. Бу түмсүүгэ Маалыкай, Хатыы, Марха, Акана, Дьиикимдэ, Өӊөлдьө оскуолаларыттан барыта 102 оҕо кыттыыны ылла. Ньурбаттан «Ньурба эрэлэ» оҕо түмсүүтүн киинин методиhа Копырина Лариса Егоровна уонна «Позитифф» оройуоннааҕы баhаатай оҕолор түмсүүлэрин чилиэнэ, Антоновка орто оскуолатын X кылааhын үөрэнээччитэ  Чочанов Артём тахсан ыалдьыттаатылар. Тэрээhин барыла эрдэттэн былааннанан, анаммыт чааhыгар саҕаланан, барыта орун - оннугар аттарыллан, түмсүүлээхтик, былааннаахтык уонна үрдүк таhымнаахтык ааста. Ол курдук, мустубут оҕолор 5 этэрээккэ хайдан араас хайысхалаах күрэхтэргэ кытыннылар. «Сэргэлээх» оҕо тэрилтэтэ уонна оскуола учууталлара «Терра инкогнита» диэн 10 түһүмэхтээх станциянан оонньуу-күрэҕин, «Следопыт» поисковай оонньууну тэрийэн ыыттылар. Маны таhынан оҕолор  «Час творчества» диэн талан ылбыт секцияларынан сылдьан үлэлээтилэр: «Миигинниин ыллас!», «Актёрскай мастарыскыай», «Очумелые ручки», «Танцуй, танцуй!» уонна «Канапе-кулинар». Акана оскуолатын оҕо тэрилтэтин салайааччыта Соркомова Анна Прокопьевна «Билиӊӊи оскуолаҕа оҕо тэрилтэтэ наада дуо?» диэн ток-шоу ыытта. Диспукка оҕолор бэйэлэрин санааларын эттилэр, оҕо тэрилтэтин тула араас боппуруостары ырыттылар, дьүүллэстилэр уонна проект көмүскээтилэр. Түмүккэ, бары биир сомоҕо буолан, биир санааҕа кэллилэр: Ньурба оройуонугар оҕо общественнай түмсүүлэрин үлэтин күүhүрдэргэ, оҕо тэрилтэтин эмблемэтигэр, символикатыгар күрэх тэрийэн ыытарга, оройуоӊӊа лидер оҕолор түмсүүлэрин, лааҕырдарын тэрийэргэ этиилэр киирдилэр.  Чахчы даҕаны, лидер оҕолор диэх курдук, бары сытыылара-хотуулара, булугас өйдөөхтөрө, көхтөөхтөрө, талааннаахтара-айымньылаахтара киhини сөхтөрдө. Бу кылгас кэмӊэ мустан, бары биир ыал оҕолорун курдук өйдөhөн-өйөhөн, кэпсэтэн-ипсэтэн, үөрэн-көтөн күннэрэ бүппүтүн билбэккэ да хааллылар. Түмүккэ, I м. «Хотугу сулус» хамаанда ылла (капитан: Платонова Ньургуhун-Маалыкай), II м. – «Смурфики» (капитан: Ушканова Сандаара, Маалыкай),  III м. – «Урааӊхайдар» (капитан: Можуков Коля, Маалыкай), IV м. – «Экстрим» (капитан: Иванова Жанна, Маалыкай), V м. – «Мохсоҕоллор» (капитан: Саввинова Сахая, Өӊөлдьө) ыллылар. Маны таhынан, оскуола иитэр үлэҕэ саабыhа Степанова Е.И. оҕолорго «Быыбар» диэн дьыалабыай оонньууну ыытта. Манна хас биирдии хамаанда, бэйэтин хамаандатын иhиттэн биир лидер оҕону талан агитациялаата, программатын иhитиннэрдэ, лидерскэй хаачыстыбатын рекламалаан дьоӊӊо-сэргэҕэ уустаан-ураннаан кэпсээтэ. Ол курдук, хамаандалар быыбарга маннык оҕолору туруордулар: Саввинова Сахая, IX кыл. (Өӊөлдьө), Чочанов Артём, X кыл. (Антоновка), Можуков Коля, X кыл. (Маалыкай), Платонова Ньургуhун, XI кыл. (Маалыкай) уонна Иванова Жанна, IX кыл. (Маалыкай). Агитациялар олус көхтөөхтүк, интэриэhинэйдик аастылар. Бу күрэҕи манна мустубут оҕо тэрилтэтин салайааччылара сыаналаатылар. Күрэх түмүгүнэн саамай элбэх куолаhы ылан «Саамай көхтөөх лидер» ааты Маалыкай оскуолатын XI кылааhын үөрэнээччитэ Платонова Ньургуhун ылла. Кыттыбыт бары лидердэргэ Копырина Л.Е. анал номинациалаах туоhу суруктары, сэмэй бэлэхтэри туттартаата. Мустубут оҕолор бары үөрэн-көтөн, дуоhуйа сынньанан, бэйэ-бэйэлэрин кытта билсиhэн-доҕордоhон, ирэ-хоро кэпсэтэн, санааларын атастаhан, оонньоон-көрүлээн, үӊкүүлээн астынан тарҕастылар. Түмүккэ уоттаах улахан шары халлааӊӊа көтүтэн – эhиил эмиэ көрсүөхпүт диэн баҕа санааларын эттилэр. Маннык  тэрээhиннэргэ  буоларын  курдук  оскуола  коллектива  бары  биир  киhи  курдук, сомо5олоhон  улэлииллэрэ  ырылыччы көhүннэ.

                              «Сэргэлээх» оҕо тэрилтэтин салайааччыта Светлана Никитина.